“Futbolli italian është ende në majë, në Evropë dhe në botë!”

Kështu e cilësoi suksesin e Italisë në Euro 2020, ish-trajneri i Shqipërisë, Gianni De Biasi, i cili aktualisht është në bankinën e Kombëtares së Azerbajxhanit.

Italia mposhti në finale Anglinë nga gjuajtja e penalltive (3-2), pasi koha e rregullt dhe shtesat në “Wembley” përfunduan 1-1. Kjo është hera e dytë që Italia fiton një Kampionat Europian, pas atij të vitit 1968.

“Është një fitore e rëndësishme, e cila vjen pas më shumë se dy vitesh në të cilat Italia nuk ka humbur kurrë një ndeshje.

Punë e shkëlqyeshme nga Mancini, i cili arriti të krijojë një grup mjaft të ri me lojtarë të mirë dhe disa talente“, tha De Biasi për Tifozët.al, gjatë një komunikimi online nga Baku, kryeqyteti i Azerbajxhanit.

Tre vite më parë kur Roberto Mancini u ul në stolin e kombëtares italiane, të kaltrit kishin përjetuar një nga dështimet më të mëdha të historisë së tyre pasi kishin mbetur jashtë Botërorit Rusi 2018. Në vetëm 36 muaj Roberto Mancini jo vetëm që i ndryshoi fytyrën kësaj Italie por e udhëhoqi drejt fitimit të një kompeticioni madhor.

Në fakt, e gjithë Italia i përulet Gigio Donnarummas. Ishte pikërisht gardiani 22-vjeçar heroi i triumfit të Italisë në Euro 2020 jo vetëm për dy penalltitë që priti në finale, por atë çfarë tregoi në tërësi në Euro 2020.