Partizani, pas partneritetit me Ambasadën Italiane në Tiranë për mbështetjen e skuadrave të vajzave në futboll, tashmë ka realizuar një tjetër marrëveshje shumë të rëndësishme.

Përfaqësuesit e klubit të kuq: Genc Tomori, drejtori i Akademisë së Partizanit; Blerina Bajko, drejtore e Komunikimit, PR & Marketing dhe Ergys Rexha, fizioterapist i Partizanit, janë mirëpritur në ambientet e Universitetit “Zoja e Këshillit të Mirë” në Tiranë, ku pjesë e diskutimit kanë qenë mbështetja ndaj lojtarëve të kuq, të cilët u janë mundësuar bursa në ndihmë të tyre.

“FK Partizani drejt një tjetër partneriteti. Përfaqësues të Klubit janë mirëpritur së fundmi në ambjentet e Universitetit “Zoja e Këshillit të Mirë” në Tiranë. Presidenti Fondacionit Padre Jerome Ndo Mih dhe Padre Paschal Mgbe përgjegjësi i politikave sportive të Universitetit Katolik “Zoja e Këshillit të Mirë” kanë shoqëruar delegacionin e kuq, i cili ka vizituar nga afër ambjentet e kampusit dhe spitalit.

Në takimin e zhvilluar është diskutuar në lidhje me praktikat e fisioterapistëve dhe mjekëve sportivë që janë pjesë e rëndësishme e ekipeve. Nga ana e tij Presidenti i Fondacionit Padre Jerome Ndo Mih ka qenë mjaft entuziast për ketë takim dhe me vullnetin e tij ka mundësuar edhe 2 bursat e para për lojtarët e Partizanit që do të pasohen me të tjera në vazhdim”, shkruan klubi i kuq në rrjetet sociale.