Federata Shqiptare e Futbollit ka hapur regjistrimet për edicionin e ri të kursit për licencimin e trajnerëve të rinj të nivelit UEFA A. Drejtoria Teknike e FSHF-së fton të gjithë të interesuarit të aplikojnë për kursin, që do të nisë më 15 janar 2024.

Kursi i trajnerëve për licencën UEFA A është në përputhje me Konventën e Trajningut të UEFA-s, që parashikon njohjen reciproke nga të gjitha federatat evropiane të titujve UEFA B, UEFA A, UEFA PRO dhe Goalkeeper UEFA-B.

Duke filluar nga 15 janari i vitit të ardhshëm kursi do të zhvillohet në Tiranë (Qendra e Ekipeve Kombëtare në Kamëz) dhe do të jetë i ndarë në 6 periudha të ndryshme, nga muaji janar në muajin maj të vitit 2024, më konkretisht 15 – 20 janar, 12-17 shkurt, 11-16 mars, 08-13 prill, 01-11 maj dhe 27-31 maj.